Suls travèses de Larzac, l'ostal "Las Coas Rojas", a 3 km de Milhau, es un luòc ideal per anar a la descobèrta dels Causses bèlses e de Cevena. Es pas per pas res que Milhau es la residencia del "Parc Naturel Régional des Grands Causses".  

Mas podretz tanben davalar a pè vistalhar lo vilatge dels terralhièrs galloromans de la Graufesenca o tot simplament vos anar passejar lo long de Tarn o Dòrbia e, benléu, al calabrun dessobtar lo vibre. 

 Amb un pauc mai de passes e d'esfòrces atenheretz los cingles de Larzac e descobriretz lo cap-barrat de la Graneda subrevolat mai d'un còp pels voldrasses. 

Se vos voletz pas cansar, vos restarà lo colombièr, qu'es mencionat tré 1367, o anar far pransièira jol tèlh, qu'es a costat. 

 Al luscre, sus la terrassa, tot en remirant lo viaducte, podretz aver la suspresa de la visita de qualque singlar o cabròl. 

 De descubrir tanben Leveson e los laques, Ròcafòrt e lo Rogièr de Camarès, los monts de Lacauna e Aubrac. 

 En un mot, seretz sonque embarrasats per causir per vistalhar una de la pus polidas, si que non la pus polida region de Franca !... 

"Las Coas-rojas" es un ancian escure-granja que èra arroinat en partida dempuèi de temps e que las coas-rojas n'avián fach lor domeni. Son totjorn dins lo canton. 

 Un còp a la retirada nos sèm vodats al reviscoladís del bastit per ne faire un lòc de vida calorós e agradable. 

 Per aquò far avèm emplegats pas que de materials "candes" : pèira e bricas de tèrra cuècha. La fusta utilisada es de "douglas", de castanhièr, de pibol e d'olm que so pas potingats. L'isolacion es facha amb de lana de fèda et de oata de cellulòsa. Los rebatedísses son de calc o de gip. 

 Pas qu'una causa a vos demandar : degalhar pas l'aiga, que la nòstra bona sorga raja pas coma un riu.